ବର୍ଷା ଋତୁରେ କେରଳମ୍ରେ ‘ଲେପ୍ଟୋସ୍ପାଇରୋସିସ୍’ ବା ‘ରାଟ୍ ଫିଭର୍’ ଆତଙ୍କ ଦେଖାଯାଇଛି । ସାଧାରଣତଃ ଘରର ବଗିଚା କାମ, କ୍ଷେତ କିମ୍ୱା ବାହାର ଜାଗାରେ ଦୈନନ୍ଦିନ କାମ କରିବା ସମୟରେ ଏହି ସଂକ୍ରମଣ ବ୍ୟାପିବାର ଆଶଙ୍କା ଅଧିକ ରହିଥାଏ । ସରକାରୀ ତଥ୍ୟ ଅନୁସାରେ, ୨୦୨୬ ଜୁଲାଇ ୨୯ ତାରିଖ ସୁଦ୍ଧା ରାଜ୍ୟରେ ୧୩୫୨ ଜଣ ଲେପ୍ଟୋସ୍ପାଇରୋସିସ୍ରେ ଆକ୍ରାନ୍ତ ହୋଇଥିବାବେଳେ ୫୮ ଜଣଙ୍କ ମୃତ୍ୟୁ ହୋଇଛି । ଲେପ୍ଟୋସ୍ପାଇରୋସିସ୍ ‘ଲେପ୍ଟୋସ୍ପାଇରା’ ନାମକ ବ୍ୟାକ୍ଟେରିଆ ଯୋଗୁଁ ହୋଇଥାଏ । ସାଧାରଣତଃ ଘର ବଗିଚା, କ୍ଷେତ କିମ୍ବା ବାହାରେ ଶାରୀରିକ ପରିଶ୍ରମ କରୁଥିବା ଲୋକେ ଏହି ରୋଗର ଅଧିକ ବିପଦରେ ରହିଥାନ୍ତି । ହସ୍ପିଟାଲ୍ ରିପୋର୍ଟ ଓ ଡେଥ୍ ଅଡିଟ୍ ତଥ୍ୟରୁ ୪୦ରୁ ୬୯ ବର୍ଷ ବୟସ୍କ ଲୋକେ ଅଧିକ ପ୍ରଭାବିତ ହୋଇଥିବା ଜଣାପଡ଼ିଛି । ଗତ କିଛି ବର୍ଷରେ ଏହି ରୋଗରେ ମୃତ୍ୟୁସଂଖ୍ୟା ମଧ୍ୟ ବଢ଼ିଛି। ୨୦୧୬ରୁ ୨୦୨୦ ମଧ୍ୟରେ କେରଳରେ ୩୧୯ ଜଣଙ୍କ ମୃତ୍ୟୁ ହୋଇଥିବାବେଳେ ୨୦୨୧ରୁ ୨୦୨୫ ମଧ୍ୟରେ ମୃତ୍ୟୁହାର ପ୍ରାୟ ୪.୨ ପ୍ରତିଶତରୁ ବଢ଼ି ୬ ପ୍ରତିଶତ ହୋଇଥିବା ତଥ୍ୟରୁ ଜଣାପଡ଼ିଛି । ସଂକ୍ରମିତ ମୂଷା ଏହି ରୋଗର ମୁଖ୍ୟ ବାହକ । ପ୍ରାଣୀମାନଙ୍କ ପରିସ୍ରା ଦ୍ୱାରା ଦୂଷିତ ହୋଇଥିବା ପାଣି କିମ୍ବା ମାଟି ସଂସ୍ପର୍ଶରେ ଆସିଲେ ଏହି ରୋଗ ହୁଏ । ଶରୀରର କଟା ସ୍ଥାନ, ଆଖି, ନାକ ଏବଂ ପାଟି ଦ୍ୱାରା ଏହି ବ୍ୟାକ୍ଟେରିଆ ଭିତରକୁ ପ୍ରବେଶ କରିଥାଏ । ଏହି ରୋଗର ମୁଖ୍ୟ ଲକ୍ଷଣଗୁଡ଼ିକ ବିଷୟରେ ଆସନ୍ତୁ ଜାଣିବା । ପ୍ରାରମ୍ଭିକ ଅବସ୍ଥାରେ ଏହା ସାଧାରଣ ଭାଇରାଲ୍ ଜ୍ୱର ପରି ଜଣାପଡ଼ିଥାଏ । ପ୍ରବଳ ଜ୍ୱର ଏବଂ ମୁଣ୍ଡବିନ୍ଧା, ମାଂସପେଶୀରେ ଜୋରଦାର ଯନ୍ତ୍ରଣା, ଥଣ୍ଡା ଲାଗିବା ଏବଂ ଦୁର୍ବଳତା, ବାନ୍ତି ଲାଗିବା, ନିଦରେ ଆଖି ଲାଗିଯିବା, କିଡନୀ ଓ ଯକୃତ କ୍ଷତିଗ୍ରସ୍ତ ହେବା, ଜଣ୍ଡିସ୍ ଏବଂ ନିଶ୍ୱାସ ନେବାରେ କଷ୍ଟ ହେବା ପରି ଲକ୍ଷଣ ଦେଖାଯାଏ । ଏହି ରୋଗରୁ ବର୍ତ୍ତିବା ପାଇଁ ବନ୍ୟା କିମ୍ବା ଦୂଷିତ ପାଣିରେ ବିନା ପ୍ରୟୋଜନରେ ପ୍ରବେଶ କରନ୍ତୁ ନାହିଁ, ପାଣିରେ କାମ କରିବାକୁ ପଡ଼ିଲେ ଗମ୍ବୁଟ୍ ଏବଂ ଗ୍ଲୋଭ୍ସ ବ୍ୟବହାର କରନ୍ତୁ । ଘର ଓ ଆଖପାଖ ଅଞ୍ଚଳରେ ମୂଷାଙ୍କ ଉପଦ୍ରବକୁ ନିୟନ୍ତ୍ରଣ କରନ୍ତୁ ।