ଭୁବନେଶ୍ୱର, ରାଜ୍ୟ କାହାଣୀ,ଓଡ଼ିଶା ସରକାରଙ୍କ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ବୁଧବାର ଦିନ ପୁରୀ ପୌରପାଳିକାର ଟାଉନ୍ ହଲ୍ଠାରେ ରାଜ୍ୟ ସ୍ତରୀୟ ‘ସହରାଞ୍ଚଳ ଜନସମ୍ପର୍କ ଓ ନାଗରିକ ସହଭାଗିତା କାର୍ଯ୍ୟକ୍ରମ’ ସଫଳତାର ସହ ଆୟୋଜିତ ହୋଇଯାଇଛି। ଏହି କାର୍ଯ୍ୟକ୍ରମ ନାଗରିକମାନଙ୍କର ସହଭାଗିତାକୁ ସୁଦୃଢ଼ କରିବା ଏବଂ ବିଗତ ଦୁଇ ବର୍ଷ ମଧ୍ୟରେ ସହରାଞ୍ଚଳ କ୍ଷେତ୍ରରେ ହାସଲ ହୋଇଥିବା ଉଲ୍ଲେଖନୀୟ ସଫଳତାକୁ ପ୍ରଦର୍ଶିତ କରିବା ପାଇଁ ଏକ ପ୍ରମୁଖ ମାଧ୍ୟମ ସାଜିଥିଲା।
ମାନ୍ୟବର ଗୃହ ଓ ନଗର ଉନ୍ନୟନ ମନ୍ତ୍ରୀ ଡକ୍ଟର କୃଷ୍ଣ ଚନ୍ଦ୍ର ମହାପାତ୍ର ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେଇ ବିଭାଗର ସ୍ୱତନ୍ତ୍ର ପୁସ୍ତିକା “ବିକାଶର ଧାରା, ଓଡ଼ିଶା ସାରା” (ଦୁଇ ବର୍ଷରେ ଦୁଇଗୁଣା ବିକାଶ) କୁ ଆନୁଷ୍ଠାନିକ ଭାବେ ଉନ୍ମୋଚନ କରିଥିଲେ।ଏହି ପୁସ୍ତିକାରେ ବିଗତ ଦୁଇ ବର୍ଷ ମଧ୍ୟରେ ଓଡ଼ିଶାର ସହରାଞ୍ଚଳଗୁଡ଼ିକରେ ହାତକୁ ନିଆଯାଇଥିବା ବିଭିନ୍ନ ରୂପାନ୍ତରଣମୂଳକ ପଦକ୍ଷେପ, ଯେପରିକି— ସହରାଞ୍ଚଳ ଭିତ୍ତିଭୂମି, ପରିମଳ, ପାନୀୟ ଜଳ ଯୋଗାଣ, ଆବାସନ, ଗମନାଗମନ, ନାଗରିକ-କେନ୍ଦ୍ରିକ ସେବା ଏବଂ କଲ୍ୟାଣକାରୀ କାର୍ଯ୍ୟକ୍ରମ କ୍ଷେତ୍ରରେ ହୋଇଥିବା ପ୍ରମୁଖ ଅଗ୍ରଗତି ବିଷୟରେ ଆଲୋକପାତ କରାଯାଇଛି। ସହରଗୁଡ଼ିକୁ ଅନ୍ତର୍ଭୁକ୍ତିକରଣ, ସହନଶୀଳ ଏବଂ ଭବିଷ୍ୟତ-ଉପଯୋଗୀ ଭାବେ ଗଢ଼ିତୋଳିବା ପାଇଁ ରାଜ୍ୟ ସରକାରଙ୍କ ପ୍ରୟାସର ଏକ ବିସ୍ତୃତ ବିବରଣୀ ଏଥିରେ ଉପସ୍ଥାପନ କରାଯାଇଛି।
ସଭାକୁ ସମ୍ବୋଧିତ କରି ଡକ୍ଟର ମହାପାତ୍ର ଗୁରୁତ୍ୱାରୋପ କରିଥିଲେ ଯେ, ସ୍ଥାୟୀ ସହରାଞ୍ଚଳ ବିକାଶ ପାଇଁ ପ୍ରଭାବଶାଳୀ ଜନସମ୍ପର୍କ ଏବଂ ସକ୍ରିୟ ନାଗରିକ ସହଭାଗିତା ଅତ୍ୟନ୍ତ ଜରୁରୀ। ସେ କହିଥିଲେ ଯେ ଯେତେବେଳେ ନାଗରିକମାନେ ବିକାଶମୂଳକ ଯୋଜନାର ପ୍ରଣୟନ, କାର୍ଯ୍ୟାନ୍ୱୟନ ଏବଂ ଅନୁଧ୍ୟାନରେ ସକ୍ରିୟ ଭାବେ ଯୋଗଦାନ କରନ୍ତି, ସେତେବେଳେ ସହରାଞ୍ଚଳ ରୂପାନ୍ତରଣ ଅଧିକ ଅର୍ଥପୂର୍ଣ୍ଣ ଏବଂ ପ୍ରଭାବଶାଳୀ ହୋଇପାରିବ।
ଏହି କାର୍ଯ୍ୟକ୍ରମରେ ଗୃହ ଓ ନଗର ଉନ୍ନୟନ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀମତୀ ଉଷା ପାଢ଼ୀ , ପୌର ପ୍ରଶାସନ ନିର୍ଦ୍ଦେଶକ ଶ୍ରୀ ଅରିନ୍ଦମ ଡାକୁଆ, ପୁରୀ ପୌରପାଳିକା କମିଶନର ସ୍ନେହା ଓର୍ଗୁଲା.ଙ୍କ ସମେତ ବିଭାଗର ବରିଷ୍ଠ ଅଧିକାରୀ, ପୁରୀ ପୌରପାଳିକାର ପ୍ରତିନିଧି, ଜନପ୍ରତିନିଧି ଏବଂ ବିପୁଳ ସଂଖ୍ୟାରେ ନାଗରିକମାନେ ଉପସ୍ଥିତ ଥିଲେ।
ରାଜ୍ୟ ସରକାରଙ୍କ ନେତୃତ୍ୱରେ ଓଡ଼ିଶାର ସହରାଞ୍ଚଳ କ୍ଷେତ୍ରରେ ହାସଲ ହୋଇଥିବା ଗୁରୁତ୍ୱପୂର୍ଣ୍ଣ ପ୍ରଗତି ଉପରେ ବକ୍ତାମାନେ ଆଲୋକପାତ କରିବା ସହ ସହରୀ ବିକାଶର ଗତିକୁ ତ୍ୱରାନ୍ୱିତ କରିବା, ସେବା ପ୍ରଦାନରେ ସୁଧାର ଆଣିବା ଏବଂ ଶାସନରେ ନାଗରିକଙ୍କ ସହଭାଗିତାକୁ ଅଧିକ ସୁଦୃଢ଼ କରିବା ପାଇଁ ବିଭାଗର ପ୍ରତିବଦ୍ଧତାକୁ ଦୋହରାଇଥିଲେ।