ଆର୍ଥିକ ବର୍ଷରେ ବିଜେପି ମାଲେମାଲ । ଚିଳିତ ବର୍ଷ ଭାରତୀୟ ଜନତା ପାର୍ଟିକୁ ସର୍ବାଧିକ ନିର୍ବାଚନୀ ଚାନ୍ଦା ମିଳିଛି । ୨୦୨୩-୨୦୨୪ ଆର୍ଥିକ ବର୍ଷରେ ସାଧାରଣ ଲୋକ, ଟ୍ରଷ୍ଟ ଏବଂ କର୍ପୋରେଟରୁ ୨,୨୪୪ କୋଟି ଟଙ୍କା ପ୍ରାପ୍ତ ହୋଇଛି । ୨୦୨୨-୨୦୨୩ ଆର୍ଥିକ ବର୍ଷରେ ମିଳିଥିବା ଚାନ୍ଦାଠାରୁ ଏହା ତିନିଗୁଣ ଅଧିକ । ଚଳିତ ବର୍ଷ କଂଗ୍ରେସ ତୁଳନାରେ ବିଜେପି ୭୭୬.୮୨% ଅଧିକ ଚାନ୍ଦା ପାଇଛି। ୨୦୨୩-୨୪ ମସିହାରେ ବିଜେପି ସର୍ବାଧିକ ୨,୨୪୪ କୋଟି ଟଙ୍କା ପାଇଥିବାବେଳେ ପୂର୍ବତନ ତେଲେଙ୍ଗାନା ସିଏମ ଚନ୍ଦ୍ରଶେଖର ରାଓଙ୍କ ଦଳ ବିଆରଏସ ଦ୍ୱିତୀୟ ସ୍ଥାନରେ ରହିଛି। ବିଆର୍ଏସ୍କୁ ୫୮୦ କୋଟି ଟଙ୍କା ମିଳିଛି। ସେହିପରି କଂଗ୍ରେସ ତୃତୀୟ ସ୍ଥାନରେ ରହି ୨୮୯ କୋଟି ଟଙ୍କା ଚାନ୍ଦା ପାଇଛି।୨୦୨୨-୨୩ ଆର୍ଥିକ ବର୍ଷରେ ରାଜନୈତିକ ଦଳକୁ ସବୁଠୁ ଅଧିକ ଚାନ୍ଦା ଦେଇଥିବା ସଂସ୍ଥା ମଧ୍ୟରେ ମେଘା ଇଞ୍ଜିନିୟରିଂ ଆଣ୍ଡ୍ ଇନଫ୍ରା ଲିଟିଟେଡ୍ ପ୍ରଥମରେ ରହିଛି । ପରେ ସିରମ୍ ଇନଷ୍ଟିଚ୍ୟୁଟ୍, ଆର୍ସଲର ମିତଲ ଗ୍ରୁପ ଏବଂ ଭାରତୀ ଏୟାରଟେଲ୍ ସାମିଲ୍ ଅଛନ୍ତି । ୨୦୨୪ ଫେବ୍ରୁଆରୀ ମାସରେ ସୁପ୍ରିମକୋର୍ଟ ଇଲେକ୍ଟୋରାଲ୍ ବଣ୍ଡ୍ ଯୋଜନାକୁ ରଦ୍ଦ କରିଦେଇଛନ୍ତି । ଏହା ପରେ ରାଜନୈତିକ ଦଳମାନଙ୍କୁ ଡାଇରେକ୍ଟ ପଇସା କିମ୍ବା ଇଲେକ୍ଟୋରାଲ ଟ୍ରଷ୍ଟ ଜରିଆରେ ନିର୍ବାଚନୀ ଚନ୍ଦା ମିଳୁଛି ।ଅନ୍ୟ ଜାତୀୟ ଦଳମାନଙ୍କ ମଧ୍ୟରେ ଆମ୍ ଆଦମୀ ପାର୍ଟି (ଆପ୍) ୨୦୨୩-୨୪ରେ ୧୧.୧ କୋଟି ଟଙ୍କାର ଅନୁଦାନ ଘୋଷଣା କରିଛି, ଯାହା ପୂର୍ବ ବର୍ଷ (୩୭.୧ କୋଟି ଟଙ୍କା) ତୁଳନାରେ କମ୍। ସିପିଏମ୍ ର ଅବଦାନ ମଧ୍ୟ ୭.୬ କୋଟି ଟଙ୍କାକୁ ବୃଦ୍ଧି ପାଇଛି। ରାଷ୍ଟ୍ରୀୟ ପିପୁଲ୍ସ ପାର୍ଟି ମେଘାଳୟରେ କ୍ଷମତାରେ ଥିବା ବେଳେ ୧୪.୮ ଲକ୍ଷ ଟଙ୍କାର ଅନୁଦାନ ଘୋଷଣା କରିଛି। ବିଏସ୍ପି ପୁଣି ୨୦ ହଜାର ଟଙ୍କାରୁ ଅଧିକ ଚାନ୍ଦା ଘୋଷଣା କରିନାହିଁ। ବିଜେଡି ମଧ୍ୟ ୨୦୨୩-୨୪ ଆର୍ଥିକ ବର୍ଷ ପାଇଁ କୌଣସି ଚାନ୍ଦା ଘୋଷଣା କରିନାହିଁ।
ଟିଡିପି ୨୦୨୩-୨୪ରେ ଆଦାୟ ହୋଇଥିବା ଅବଦାନ ପରିମାଣ ୧୦୦ କୋଟି ଟଙ୍କାରୁ ଅଧିକ ବୋଲି କହିଥିବା ବେଳେ ବିଜେଡି ଶୂନ ଏବଂ ସମାଜବାଦୀ ପାର୍ଟି ପୂର୍ବ ବର୍ଷ ତୁଳନାରେ ୪୬.୭ ଲକ୍ଷ ଟଙ୍କା ଯୋଗଦାନ ଦର୍ଶାଇଛି।